ക്ലാസ് 6

മംഗളവാര്‍ത്ത, ഈശോയുടെ ജനനം എന്നിവയാണ് ഈ പാഠം അവതരിപ്പിക്കുന്നത്. ക്രിസ്തുമസിനെക്കുറിച്ചുള്ള വിശദമായ വിവരങ്ങളും ക്രിസ്തുമസിനോട് നമുക്കുണ്ടാവേണ്ട മനോഭാവവും ഇതില്‍ ഉള്‍ക്കൊള്ളിച്ചിരിക്കുന്നു. ഒരു ആഘോഷം എന്നതില്‍ക്കവിഞ്ഞ് ലോകരക്ഷകനായ ഈശോയെ വരവേല്‍ക്കാനുള്ള അവസരമായി ക്രിസ്തുമസിനെ കുട്ടികള്‍ക്കു മുമ്പില്‍ അവതരിപ്പിക്കാന്‍ ഈ പാഠം ഉപകരിക്കണം.

പരസ്യജീവിതത്തിന്‍റെ ആരംഭത്തില്‍ ഈശോ സ്നാപകയോഹന്നാനില്‍നിന്ന് മാമ്മോദീസ സ്വീകരിക്കുന്നതാണ് ഈ പാഠത്തിലെ പ്രധാന ആശയം. യോഹന്നാന്‍ ഈശോയെ ലോകത്തിന് വെളിപ്പെടുത്തി. ലോകത്തിന്‍റെ പാപങ്ങള്‍ നീക്കാന്‍ വന്ന ദൈവത്തിന്‍റെ കുഞ്ഞാടായ ഈശോ നമ്മുടെയും പാപങ്ങള്‍ ഏറ്റെടുക്കുന്നുവെന്ന ബോധ്യം കുട്ടികള്‍ക്കു പകരാന്‍ ഈ പാഠം സഹായിക്കും.

സാത്താന്‍ ഉയര്‍ത്തിയ പ്രലോഭനങ്ങളെ ഈശോ എങ്ങനെയാണ് അതിജീവിച്ചതെന്ന് ഈ പാഠം വിശദമാക്കുന്നു. വചനാധിഷ്ഠിത ജീവിതം, നോമ്പും ഉപവാസവും, പ്രാര്‍ത്ഥനാജീവിതം, ജീവകാരുണ്യ പ്രവര്‍ത്തനങ്ങള്‍ തുടങ്ങിയവയൊക്കെ പ്രലോഭനങ്ങളെ നേരിടാന്‍ നമ്മെ സഹായിക്കുമെന്ന ബോധ്യം കുട്ടികള്‍ക്ക് നല്‍കാന്‍ ഈ പാഠം ഉപകരിക്കും.

സുവിശേഷം പ്രസംഗിക്കുവാന്‍ ആരംഭിക്കുന്ന ഈശോയുടെ വാക്കുകളും പ്രവൃത്തികളുമാണ് ഈ പാഠത്തിലെ ഉള്ളടക്കം. സമഗ്രവിമോചകനായ ഈശോയെ ഇവിടെ പരിചയപ്പെടാം. അവിടുന്ന് അറിയിച്ച സുവിശേഷം ഏറ്റുവാങ്ങാനും അത് മറ്റുള്ളവര്‍ക്ക് പകര്‍ന്നുകൊടുക്കാനും കടപ്പെട്ടവരാണ് നാമെന്നുള്ള ചിന്തയിലേക്ക് കുട്ടികളെ നയിക്കാന്‍ ഈ പാഠം ഉപകരിക്കും.

വെള്ളം വീഞ്ഞാക്കിയതു മുതല്‍ ഈശോ ചെയ്ത അത്ഭുത പ്രവൃത്തികളെക്കുറിച്ച് പ്രതിപാദിക്കുന്ന പാഠമാണിത്. തന്നിലെ ദൈവമഹത്വത്തെ വെളിപ്പെടുത്തുന്ന ഈശോയെ ഇവിടെ ദര്‍ശിക്കാം. മനുഷ്യന്‍റെ വിവിധ ആവശ്യങ്ങളെ മുന്‍നിര്‍ത്തിയാണ് അവിടുന്ന് അത്ഭുതങ്ങള്‍ പ്രവര്‍ത്തിച്ചത്. മനുഷ്യരക്ഷയ്ക്കും ദൈവമഹത്വത്തിനുമായി ഈശോ ചെയ്ത അത്ഭുതകൃത്യങ്ങള്‍ നമ്മുടെ വിശ്വാസ വളര്‍ച്ചയ്ക്ക് ഉപകരിക്കുന്ന വിധം വിശദീകരിക്കാന്‍ ടീച്ചര്‍ ശ്രദ്ധിക്കണം

പിതാവിന്‍റെ പക്കലേയ്ക്ക് തിരിച്ചുവന്ന ധൂര്‍ത്തപുത്രന്‍റെ കഥ പറയുന്ന പാഠമാണിത്. പാപികളെ തേടിവന്ന ഈശോയെയും പാപികളോട് കാരുണ്യം കാണിക്കുന്ന സ്വര്‍ഗീയ പിതാവിനെയും കുട്ടികള്‍ പരിചയപ്പെടാന്‍ ഈ പാഠം ഉപകരിക്കും. നഷ്ടപ്പെട്ടതിനെ വീണ്ടെടു ക്കുവാനും പാപികള്‍ക്ക് മോചനം നല്‍കുവാനും ഈശോ ഇന്നും തല്പരനാണെന്ന പരമാര്‍ത്ഥം ഈ പാഠത്തിലൂടെ കുട്ടികള്‍ക്ക് നല്‍കാനാവും.

നമ്മുടെ പാപങ്ങള്‍ക്കുവേണ്ടി വേദന സഹിക്കുകയും മുറിവുകള്‍ ഏറ്റെടുക്കുകയും ചെയ്ത ഈശോയെക്കുറിച്ച് ഈ പാഠത്തില്‍ പ്രതിപാദിക്കുന്നു. പീഡാനുഭവങ്ങളിലൂടെ കടന്നുപോയ ഈശോയെ ശരിയായി മനസ്സിലാക്കുവാന്‍ ഈ പാഠം സഹായിക്കും. സഭയിലും സമൂഹത്തിലും വേദനിക്കുന്നവര്‍ക്ക് ആശ്വാസമേകാന്‍ ക്രിസ്തുവിന്‍റെ ശിഷ്യരായ നമുക്ക് കടമയുണ്ടെന്ന കാര്യവും ഈ പാഠം അനുസ്മരിപ്പിക്കുന്നു.

മനുഷ്യവംശത്തിന്‍റെ രക്ഷയ്ക്കുവേണ്ടി കുരിശില്‍ മരിച്ച ഈശോയെ അവതരിപ്പിക്കുന്ന പാഠമാണിത്. അവിടുത്തെ സഹനങ്ങളും വേദനകളും അന്ത്യനിമിഷങ്ങളിലെ യാതനകളും ഇതില്‍ വിവരിക്കുന്നു. നമുക്കായി വേദന സഹിച്ചു മരിച്ച ഈശോയെ, പാപം ചെയ്യുമ്പോഴെല്ലാം നാം വീണ്ടും വീണ്ടും വേദനിപ്പിക്കുകയാണെന്ന പരമാര്‍ത്ഥം കുട്ടികള്‍ക്ക് വ്യക്തമാക്കിക്കൊടുക്കാന്‍ കൂടി ഈ പാഠം ഉപകരിക്കും.

സ്നേഹത്തിന്‍റെ മാതൃകയും സ്നേഹത്തിന്‍റെ കല്പനയും നല്‍കിയ ഈശോയെ ഈ പാഠത്തില്‍ പരിചയപ്പെടാം. പരിധിയില്ലാത്ത ക്ഷമയെക്കുറിച്ച് ഈശോ പഠിപ്പിച്ചു. ഈശോയുടെ ശിഷ്യന്മാരായിത്തീരുന്നവര്‍ പാലിക്കേണ്ട സ്നേഹത്തിന്‍റെ പുതിയ നിയമത്തെക്കുറിച്ച് ശരിയായി ഗ്രഹിക്കുവാന്‍ ഈ പാഠം സഹായിക്കും. കുരിശുമരണത്തിലും സ്നേഹവും ക്ഷമയും പ്രദര്‍ശിപ്പിച്ച ഈശോയോട് കുട്ടികള്‍ക്ക് കൂടുതല്‍ അടുപ്പമുണ്ടാകുന്ന വിധത്തില്‍ പാഠം അവതരിപ്പിക്കണം.

മരണത്തെ ജയിച്ച് ഉയിര്‍ത്തെഴുന്നേറ്റ ഈശോയെക്കുറിച്ചാണ് ഈ പാഠത്തില്‍ വിവരിക്കുന്നത്. പ്രവചനങ്ങളിലൂടെ പറയപ്പെട്ടത് പൂര്‍ത്തിയായതെങ്ങനെ എന്ന് വ്യക്തമാക്കുന്ന പാഠം. തിരുനാളുകളുടെ തിരുനാളായ ഉയിര്‍പ്പു തിരുനാള്‍ ക്രൈസ്തവര്‍ക്ക് എത്രമാത്രം പ്രധാനപ്പെട്ടതാണെന്നും ഇതില്‍ വിശദമാക്കുന്നു. ഉയിര്‍ത്തെഴുന്നേറ്റ ഈശോയെ കൂടുതല്‍ സ്നേഹിക്കാനും ഈശോയില്‍ ജീവിക്കാനും കുട്ടികളെ സഹായിക്കുന്ന വിധത്തില്‍ ഈ പാഠം അവതരിപ്പിക്കണം.

ഉയിര്‍ത്തെഴുന്നേറ്റ ഈശോ എമ്മാവൂസിലേയ്ക്കുള്ള യാത്രയില്‍ ശിഷ്യന്മാര്‍ക്ക് പ്രത്യക്ഷപ്പെടുന്നതും തന്നെത്തന്നെ വെളിപ്പെടുത്തുന്നതുമാണ് എമ്മാവൂസ് അനുഭവം. ലോകാവസാനം വരെയും താന്‍ കൂടെയുണ്ടാകുമെന്ന വാഗ്ദാനം അവിടുന്ന് നിറവേറ്റി. വിശുദ്ധ കുര്‍ബ്ബാനയിലൂടെ ഈശോയുടെ സാന്നിദ്ധ്യം നാം അനുഭവിക്കുന്നു. ഈ യാഥാര്‍ത്ഥ്യം വിശദീകരിക്കുന്ന പാഠമാണിത്. വി. കുര്‍ബ്ബാനയിലെ ഈശോയുടെ സാന്നിദ്ധ്യത്തെ അടുത്തറിയാന്‍ ഈ പാഠം സഹായിക്കും.

തോമാശ്ലീഹാ നടത്തുന്ന വിശ്വാസപ്രഖ്യാപനമാണ് ഈ പാഠത്തിന്‍റെ പ്രതിപാദ്യം. ഈശോ കര്‍ത്താവാണെന്ന് ഹൃദയത്തില്‍ വിശ്വസിക്കുകയും അധരംകൊണ്ട് ഏറ്റുപറയുകയും ചെയ്യുന്ന യഥാര്‍ത്ഥ വിശ്വാസത്തിന്‍റെ ചിത്രം ഈ പാഠം അവതരിപ്പിക്കുന്നു. വിശ്വാസത്തിന്‍റെ വിത്തുകള്‍ കുട്ടികളില്‍ പാകി മുളപ്പിക്കാന്‍ ഇത് ഉപകരിക്കും

ഉത്ഥാനം ചെയ്ത ഈശോ തന്‍റെ ശിഷ്യന്മാരെ പ്രേഷിതദൗത്യം ഏല്പിച്ചശേഷം സ്വര്‍ഗാരോഹണം ചെയ്യുന്നതിനെ പ്രതിപാദിക്കുന്ന പാഠമാണിത്. ഓരോ ക്രൈസ്തവന്‍റെയും പ്രേഷിതദൗത്യം എന്തെന്നും ഈ പാഠത്തില്‍ ചര്‍ച്ച ചെയ്യുന്നു. ജീവിതമാതൃകയിലൂടെ ഈശോ കര്‍ത്താവാണെന്ന് വ്യക്തമായി പ്രഘോഷിക്കാനുള്ള കടമ ഓരോരുത്തര്‍ക്കുമുണ്ടെന്ന് കുട്ടികള്‍ക്ക് വ്യക്തമാക്കിക്കൊടുക്കാന്‍ ഈ പാഠം സഹായിക്കും.

അപ്പസ്തോലന്മാരുടെ മേല്‍ പരിശുദ്ധാത്മാവു വന്നു നിറഞ്ഞ പന്തക്കുസ്താദിനത്തെ അവതരിപ്പിക്കുന്ന ഈ പാഠത്തില്‍ സുവിശേഷ പ്രഘോഷണത്തിന്‍റെ തീവ്രതയും തീക്ഷ്ണതയും വിശദമാക്കുന്നുണ്ട്. ആരാധനക്രമവത്സരത്തില്‍ പന്തക്കുസ്തയെ അവതരിപ്പിക്കാനും ഈ പാഠം ഉപകരിക്കുന്നു.

സ്വര്‍ഗത്തില്‍ പിതാവായ ദൈവത്തിന്‍റെ വലതുഭാഗത്ത് ഉപവിഷ്ടനായിരിക്കുന്ന രാജാധിരാജനായ ഈശോയെ ഈ പാഠം അവതരിപ്പിക്കുന്നു. അന്ത്യവിധിയുടെ ചിത്രം വ്യക്തമായി വിവരിക്കുന്ന ഈ പാഠത്തില്‍ യഥാര്‍ത്ഥ ക്രിസ്ത്യാനി എന്തു ചെയ്യണമെന്ന് വിശദമാക്കുന്നുണ്ട്. സ്വര്‍ഗത്തെ ലക്ഷ്യമാക്കി നീങ്ങുന്ന തീര്‍ത്ഥാടകസഭയിലെ അംഗങ്ങളായ നാമേവരും ജീവിതലക്ഷ്യം നേടുന്നതിന് എങ്ങനെ പെരുമാറണമെന്ന് കുട്ടികളെ പഠിപ്പിക്കുവാന്‍ ഈ പാഠം ഉപകരിക്കുന്നു.